Adväntsmärit Lützuflüeh 2025

Vom Päscu Schäkel

Letschte Samschtig isch es mau wieder sowit gsi. Dr Lützuflüeher Adväntsmärit 2025 het sini Tor für d Bevöukerig g’öffnet. Knackpunkt bi däm Event isch aube chli ds Wätter. Das isch ou i däm Jahr chli dürzoge gsi. Ab und zue het e Windböe dürezoge, mängisch hets chli afe rägele. Aber grundsätzlech isch es guet gsi und vorallem schön warm. Nid grad so wiehnachtlech, aber hey, me cha nid aues ha. Es het ömu reichlech Publikum ahzoge.

Und das Volk het Hunger und Durscht gha. Zum Glück hets, näbe vielem Andere, dr Stand vom TV Lützelflüh Athletics gha. Am glyche Ort wie im letschte Jahr poschtiert, hei d Lüt sofort gwüsst, wo si Nicole’s Chürbiscrèmesuppe und roui Mänge a wyssem Glüewy finde. Scho zum Start isch es losgange wie ds Bisiwätter. Ds Personal am Stand isch fasch nid nachecho, mit schöpfe, rüehre, yfülle und ykassiere. Zum Glück hei sech vieli hiufriichi Händ gmäudet um ds unterstütze. So macht Teamwork im Verein Spass. Danke viu mau!

So isch die Zyt am Märit wie im Flug düregange. Es isch viel gschaffet worde, aber ou viel gschwaflet. Das ghört ja zum Glück drzue. Eifach mit em Glüewy het me chli müesse ufpasse. Dä isch chli «heimlifeiss» gsi. Superfein, aber zviu het me also nid dörfe nä. Süsch hätt me ir Nacht de müesse dr Scheiche us em Bett häbe…

Zum Redaktionsschluss vo däm Artiku isch no nid klar gsi, wieviel Getränk und Fueter abgsetzt isch worde. Aber ig nime mau a, dass das Ganze e Erfolg isch worde. D Lützuflüeherinne, d Lützuflüeher und d Lüt us dr Region wüsse haut fängs, wo me ds guete Zügs brchunnt.

Dä Märit isch wie immer e gueti Müglechkeit gsi, Wärbig für e Verein ds mache. Das isch sicher glunge. Dr Verein isch so no einisch feschter ir Region verankeret worde. E super Sach.
Ig wage jetzt mau e Vermuetig… mir si nächts Jahr sicher wieder mit drbi