BBA Hallenmeeting in Magglingen

Von Päscu Schäkel

Wenns dusse winterlech chaut isch, denn verzieh sech d Liechtathlete id Halle. Das gilt ir Regu für d Trainings, aber no viu meh für d Wettkämpf. Und e söttige Wettkampf findet jedes Jahr öppe zur glyche Zyt in Magglingen statt, im nationale Sportzäntrum. Ir Halle «End der Welt». Zum Glück isch dr Name vo dere Alag dört obe uf 960 Meter nid würklech Programm, süsch wärs bi dr Ahreis chli kriminell worde. Dr dicht Näbu het nämlech so ne Suppe dört uf dä Höger gschlirgget, dass me chuum d Häng vor em Gring het gseh, oder äbe ds End vor Wäut…

A däm näbulöse Sunndig hei sech folgendi Athletinne und Athlete vom TV Lützuflüeh Athletics ahgmäudet. Adi Flükiger, Crispin Krause, Elea Hausammann, Ayleen Burkhalter, Ziva Lehmann und vo Hug’s dr Lenny, d Léonie und d Sophie.

Da aui zu unterschiedleche Zyte hei müesse starte, si am Morge mit de Leiter nid scho aui mitcho. Bis zum Schluss si also immer wieder es paar Sportler inetröpfelet id Arena.

Dr Start i Wettkampf het d Elea gmacht. Si het 60m Hürdelouf gmacht. D Elea isch gägenüber dr Konkurränz ir Serie 3 grössemässig sicher chli im Nachteil gsi, aber das Modi isch nach em Startschuss ab wie ne Ragete und het i ihrem Vorlouf über die 76,2 cm höche Hürde dr toll 3. Platz gholt, mit ere super persönleche Beschtzyt vo 11.49s. Gratulation! Da freue mir üs doch uf kommendi Renne.

Dr Adi het ds gröschte Programm gha, das dr ganz Tag düre. Gstartet het är mit Chügele. Em Adi isch es guet gloffe. Är het i sim 4. Versuech mit 8.80m chönne sini persönlechi Beschtwyti erreiche. Das het ihm schliesslech dr guet 13. Platz ergäh. Um e Mittag ume isch de Wytsprung ahgseit gsi. D Konkurränz isch riesig gsi. Und zu allem Übu isch es ihm de ou nid so guet gloffe. Warum het är gloubs säuber nid gwüsst. Irgendwie het dr Pfupf gfählt. Vo de drü Versüech het är zwe Zählbari gschafft. Mit 4.18m het das leider nume zum 34. Platz glängt. Egal, mir wüsse, dass ärs besser cha. Zum Schluss het Adi noch Hochsprung gmacht. Starthöchi 1.30m. Und dr Pfupf isch ume zrügg gsi, äuä wägem Hörnlisalat. Adi het souverän sini nöi PB vo 1.51m übersprunge. Das het dr 11. Platz gä, mit glycher Höchi wie dr 7. Platz. Mit zwöine PB het Adi dä Event also sehr erfolgrich abgschlosse. Bravo.

Näre si d Sprinter und d Sprinterinne dranne gsi. 60m si ahgseit gsi. Meh wär ou i dere Halle gar nid gange. Zersch, im Vorlouf 4 vo de U14W, isch d Sophie am Start gsi. Nach perfektem Töifstart isch si abdüüset und het sech verdient mit 9.23s e persönlechi Beschtzyt gholt. Das isch Platz 4 i ihrer Serie gsi. Us Zwöits isch d Ayleen im Vorlouf 6 vo de U14W dranne gsi. Ou si het e guete Töifstart gha und het sech es tolls Renne mit ihrne Konkurräntinne glieferet. Zyt? 9.78s, Platz 6 i ihrer Serie. Ou das heisst PB für d Ayleen! Bravo dene beidne Modis. Toll.

Und de isch dr Crispin dranne gsi. I de Löif vo de Manne, Vorlouf 15 ! Ahgstachlet vo dr Zyt vom Timothé Mumenthaler (immerhin Europameischter über 200m vo Rom), het Crispin e super Zyt gloffe. Klari persönlechi Beschtzyt vo 8.18s. Wow! Was für ne Louf. 2. Platz i sire Serie. Sehr cool. Crispin isch aber no nid fertig gsi. Är isch no ga Wytsprung mache, ir glyche Serie wie dr Adi. Crispin isch es guet gloffe. Drü Mau super Absprung uf em Balke, het är mit 5.15m dr 13. Platz gholt.

Lang het d Léonie müesse uf ihre Uftritt warte. Aber wos ändlech nache isch gsi (mit reichlech Verspätig) isch si parat gsi. Guet warm het si grad im erschte Stoss 5.93m gschaffet. Ds erschte Mau mit ere 3kg Chugle. Die nächste Versüech si de nümme so wyt. Isch d Luft scho chli dusse gsi? Nei, natürlech nid. Im letschte sächste Versuech het Léonie no einisch e Energieschub gha und d Chugle uf 5.95m gstosse. Das het dr guet 13. Platz gä. Super Erfahrig gsi i dere grosse Halle. Bravo Léonie.

Und « last, but not least» si de no üsi Mittustreckler dranne gsi. Zersch dr Lenny. Das Jahr mit 600m. Letscht Jahr het är no dr Kilometer gmacht. Gstartet si 42 Sportler über aui Altersklasse zäme. Dä Lenny isch het das Renne super yteilt und isch mega guet gseklet. Mit ere Zyt vo 1:35,18 isch Lenny nach super Ändspurt uf e 12. Platz cho. Über U16 isch är sogar 2. worde. Absolut genial, bravo Lenny.

Und churz vor de Putzfroue und Putzmanne isch no d Ziva dra cho. 1000m si ahgseit gsi. Füf Rundine mit chli Supplement het si müesse/dörfe renne. Ou hie isch über alli Altersklasse gwärtet worde. 47 Froue und Modis si gstartet. Ou d Ziva het ihres Renne sehr professionell yteilt. Während es paar ab si wie wiudi Ross, isch d Ziva cool bliebe. Sie het ihri Rundine souverän gseklet und het zum Schluss es paar wiudi Ross y- und überholt. Mit 3:38,14 isch si tolli 35igsti worde. Under de U14 het si sogar dr 5. Platz gholt. Sehr cool.

Ja, und de isch dä Event ou scho ume gsi. Die Giele und Modis hei e super Tag yzoge, mit tolle Leischtige. D U14erinne si öppe chli närvös gsi, wüu me haut allei uf e Platz het müesse und wüu me die Ahlage no nid so kennt het. Aber die hei das aui souverän gmacht.

Die Meischte si de scho früecher individuell heigfahre. Wo ds Leiterteam usem Remo, em Nils und em Päscu us dr Halle si cho, het sech ou dr Näbu verzoge. Super. Dr ganz Tag «Soupe épaisse grise» und wenns dunku wird und de Hei wosch… Jänu. Aui si ziemlech müed gsi vo däm länge Tag, aber sehr stolz uf die tolle Sportlerinne und Sportler.