Ä Bricht zur Lützufiir 2025 in Grüenematt

Vom Päscu Schäkel

Ou im 2025 het sech d Gmeind Lützuflüeh, bzw. d Kulturkommission entschiede, wieder e Lützufiir dürezfüere. Dä Alass, wo unterschiedlechschti Leischtige us Sport, Kultur, Bruef, usw. g’ehrt wärde, isch wie letscht Jahr wiederum ir Halle Grüenematt düregfüehrt worde. D Stefanie Gsell und ihri Kolleginne und Kollege hei dür dä Abe gfüehrt.

Näbe musikalische Darbietige, si Ehrige vo Riterinne, Nothäufer, Chörli, Parkettlegger, usw. düregfüert worde. Und äbe ou Ehrige vo tolle Leischtige vom TV Lützuflüeh Athletics. I däm Jahr si uszeichnet worde:

• Jonas Bärtschi, für e schnäuscht Ämmitaler über 1000m
• Colin Eggimann, für sini Rangierig ir BLV Beschteliste im Chügele.
• Janik Eggimann, für sini Leischtige a de Kantonale im Chügele und Speer.
• Nils Schäkel, für sini div. Podestplätz a verschiedene Löif im 2024.
• Hanspi Widmer und Hans Schlegel für ihri jahrelange Tätigkeite im Rahme vom Fit durch den Winter / Turnen für Jedermann im Verein.

Die 6 Herrä hei sech uf dr Bühni wacker gschlage und hei üse Verein sehr positiv i üsere Gmeind verträte und drmit positivi Wärbig gmacht.

Nach dene ganze Präsentatione het de d Gmeind no es Apéro gspändet. I gselligem Rahme, isch de dä Alass spät am Abe beändet worde.

Härzlechi Gratulation dene Sächs für ihri tolle Leischtige.